دُنیا کے معروف فٹبالر اور فرانس کے اسٹار فارورڈ کائیلین ایمباپے نے سویڈن کے خلاف دو گول داغ کر فیفا ورلڈ کپ کی تاریخ میں ایک اور بڑا اعزاز اپنے نام کر لیا۔ 18 گولز کے ساتھ وہ میگا ایونٹ کی تاریخ کے دوسرے سب سے زیادہ گول کرنے والے کھلاڑی بن گئے ہیں۔
ایمباپے نے اس شاندار کارکردگی کے ساتھ جرمنی کے سابق اسٹار میروسلاو کلوزے کا 16 گولز کا ریکارڈ پیچھے چھوڑ دیا۔ اب وہ مجموعی طور پر 18 ورلڈ کپ گولز کے ساتھ صرف ایک گول کے فرق سے ارجنٹینا کے کپتان لیونل میسی کے قریب پہنچ گئے ہیں، جن کے نام 19 گولز درج ہیں۔
جاری ورلڈ کپ میں بھی ایمباپے کی فارم برقرار ہے اور وہ اب تک 6 گول کر چکے ہیں، یوں وہ اس ایڈیشن میں سب سے زیادہ گول کرنے والوں کی فہرست میں لیونل میسی کے برابر آ گئے ہیں اور گولڈن بوٹ کی دوڑ میں مضبوط امیدوار بن چکے ہیں۔
مزید برآں، ایمباپے نے ورلڈ کپ کے ناک آؤٹ مرحلے میں بھی ایک نیا سنگِ میل عبور کیا ہے۔ سویڈن کے خلاف دو گولوں کے بعد ناک آؤٹ مقابلوں میں ان کے مجموعی گولز کی تعداد 10 ہو گئی، جس کے ساتھ وہ ورلڈ کپ کی تاریخ میں ناک آؤٹ مرحلے کے کامیاب ترین گول اسکورر بن گئے ہیں۔
