فٹبال کے دو بڑے نام Lionel Messi اور Cristiano Ronaldo ایک منفرد عالمی اعزاز اپنے نام کرنے کے قریب پہنچ گئے ہیں، کیونکہ دونوں اسٹارز کے 2026 کے فیفا ورلڈ کپ میں شرکت کے امکانات روشن ہیں۔
اگر میسی اور رونالڈو اگلے ورلڈ کپ میں میدان میں اترتے ہیں تو وہ 6 مختلف عالمی کپ کھیلنے والے دنیا کے پہلے فٹبالرز بن جائیں گے۔ اس سے قبل دونوں 2006، 2010، 2014، 2018 اور 2022 کے ورلڈ کپ میں اپنی ٹیموں کی نمائندگی کر چکے ہیں، جبکہ شائقین 2026 کے ممکنہ مقابلے کو دونوں لیجنڈز کا ’’آخری سفر‘‘ قرار دے رہے ہیں۔
میسی نے 2022 کے ورلڈ کپ میں ارجنٹائن کو عالمی چیمپئن بنانے میں مرکزی کردار ادا کیا تھا اور اب بھی قومی ٹیم کے اہم رکن ہیں۔ وہ ورلڈ کپ میں اب تک 26 میچز کھیل کر 13 گول اسکور کر چکے ہیں، جبکہ کلب فٹبال میں بھی عمدہ فارم میں نظر آ رہے ہیں۔
دوسری جانب رونالڈو پرتگال کی ٹیم کے لیے مسلسل اہمیت رکھتے ہیں اور ممکنہ طور پر اپنے آخری عالمی ٹورنامنٹ کی تیاری کر رہے ہیں۔ رونالڈو اس بات کا اشارہ دے چکے ہیں کہ 2026 کا ورلڈ کپ ان کے بین الاقوامی کیریئر کا اختتامی بڑا ایونٹ ہو سکتا ہے۔
دلچسپ بات یہ ہے کہ اگر دونوں عظیم کھلاڑی ایک ہی ورلڈ کپ میں مدمقابل آئے تو فٹبال کی تاریخ میں پہلی بار میسی اور رونالڈو ورلڈ کپ کے کسی میچ میں ایک دوسرے کے خلاف کھیلتے دکھائی دے سکتے ہیں، جس کا دنیا بھر کے شائقین شدت سے انتظار کر رہے ہیں۔
