ایشین یوتھ گیمز میں پاکستان نے بہترین کارکاردگی کا مظاہرہ کرتے ہوئے والی بال ایونٹ کے فائنل میں رسائی حاصل کرلی۔

رپورٹس کے مطابق سیمی فائنل میں پاکستان کی والی ٹیم انڈونیشیا کو 3۔1 سے شکست دینے میں کامیاب رہی۔

پاکستان اور انڈونیشیا کے درمیان ایشین یوتھ گیمز میں والی بال کا سیمی فائنل بحرین کے عیسیٰ اسپورٹس ہال میں 1 گھنٹہ 34 منٹ جاری رہا، جس میں دونوں ٹیموں کے درمیان دلچسپ مقابلہ دیکھنے کو ملا۔

میچ کا پہلا سیٹ انڈونیشیا نے 22-25 سے جیتا لیکن اس کے بعد پاکستان نے کم بیک کرکے مسلسل 3 سیٹس میں فتح حاصل کی، دوسرے اور تیسرے سیٹ میں پاکستان کو زیادہ مزاحمت کا سامنا نہیں کرنا پڑا۔

چوتھے سیٹ میں انڈونیشین پلیئرز نے اچھا کھیل پیش کیا لیکن وہ پاکستان پر برتری حاصل کرنے میں ناکام رہے، یوں پاکستان نے سیمی فائنل میچ 22-25, 25-13, 25-19 اور 26-24 کے اسکور سے اپنے نام کرلیا۔

پاکستان کا ایونٹ کے فائنل میں مقابلہ ایران سے ہوگا، پاکستان والی بال فیڈریشن ٹیم سے گولڈ میڈل کیلئے پر امید ہے۔