بھارتی کرکٹ کے نامور بیٹر اور سابق کپتان ویرات کوہلی کے بارے میں تازہ اطلاعات نے مداحوں میں حیرت پیدا کر دی ہے۔ خبریں بتا رہی ہیں کہ کوہلی نے انڈین پریمیئر لیگ (آئی پی ایل) میں اپنی ٹیم رائل چیلنجرز بنگلورو (آر سی بی) کے ساتھ نیا معاہدہ کرنے سے انکار کر دیا ہے، جس کے بعد ان کے ممکنہ ریٹائرمنٹ کے بارے میں قیاس آرائیاں شروع ہو گئی ہیں۔
بھارتی اسپورٹس ویب سائٹس کے مطابق، کوہلی نے آر سی بی کے ساتھ اپنا معاہدہ 2026 تک بڑھانے سے انکار کیا ہے اور ٹیم کو مشورہ دیا ہے کہ وہ آئندہ منصوبہ بندی ان کے بغیر یا ان کے برانڈ امیج کے استعمال کے بغیر کرے۔
یہ خبر سامنے آنے کے بعد سوشل میڈیا پر مداحوں نے اپنی تشویش کا اظہار کیا اور سوال کیا کہ کیا کوہلی واقعی آئی پی ایل سے ریٹائرمنٹ لینے کا ارادہ رکھتے ہیں۔
کوہلی 2008 سے آر سی بی کا حصہ ہیں اور کئی سالوں تک ٹیم کی قیادت بھی کر چکے ہیں۔ 2025 میں آر سی بی نے اپنی پہلی آئی پی ایل ٹرافی جیتی، جو کوہلی اور ان کے مداحوں کے لیے یادگار لمحہ تھا۔
تاہم، ان کے تازہ فیصلے کے بعد شکوک پیدا ہوئے ہیں کہ وہ ممکنہ طور پر آہستہ آہستہ کرکٹ سے کنارہ کشی کی جانب بڑھ رہے ہیں۔ اب تک نہ کوہلی اور نہ ہی آر سی بی نے اس معاملے پر کوئی باضابطہ بیان جاری کیا ہے۔
یاد رہے کہ کوہلی پہلے ہی ٹیسٹ اور ٹی ٹوئنٹی کرکٹ سے ریٹائر ہو چکے ہیں، اور ان کے ون ڈے انٹرنیشنل مستقبل کے بارے میں بھی سوالات پیدا ہو رہے ہیں۔
