کٹھمنڈو میں جاری نیپال پریمیئر لیگ کے دوران ایک بڑا سٹے بازی سکینڈل سامنے آیا ہے، جس میں 9 بھارتی اور ایک نیپالی شہری کو گرفتار کیا گیا ہے۔ پولیس کے مطابق یہ گروہ آن لائن غیر قانونی بیٹنگ نیٹ ورک چلا رہا تھا۔
نیپال پولیس کی جانب سے خفیہ اور اچانک چھاپوں میں گرفتار ملزمان کی عمریں 19 سے 35 سال کے درمیان ہیں اور بھارتی شہری آندھرا پردیش کے رہائشی ہیں۔ ابتدائی کارروائی میں سمکھوسی، کٹھمنڈو میں ایک کرائے کے مکان پر چھاپہ مار کر آٹھ افراد کو رنگے ہاتھوں پکڑا گیا، جہاں سے 15 موبائل فون، ڈیجیٹل ریکارڈز اور بیٹنگ ڈیٹا ضبط کیا گیا۔
ایک روز بعد مزید کارروائی میں ایک بھارتی اور ایک نیپالی شہری کو بھی گرفتار کیا گیا، جس سے مجموعی تعداد 10 ہو گئی۔
پولیس ترجمان ایس پی کاجی کمار آچاریا کے مطابق ابتدائی تفتیش سے معلوم ہوا ہے کہ گروہ تقریباً 5 لاکھ نیپالی روپے کے حجم سے بیٹنگ کر رہا تھا، تاہم دیگر شواہد سے اندازہ ہوتا ہے کہ اس نیٹ ورک کا مالی حجم 2 کروڑ 50 لاکھ روپے (تقریباً 1.75 لاکھ امریکی ڈالر) تک پہنچ سکتا ہے۔
مزید یہ کہ گرفتار افراد کرپٹو کرنسی کے ذریعے غیر قانونی ٹرانزیکشنز میں بھی ملوث پائے گئے ہیں، جس سے کیس کی سنگینی اور بڑھ گئی ہے۔
نیپال پولیس نے اس معاملے کی مزید تحقیقات شروع کر دی ہیں اور ممکنہ دیگر ملزمان کی شناخت پر کام جاری ہے۔
