چیئرمین پی سی بی محسن نقوی نے غنی لاہور سکول کرکٹ کپ کا افتتاح کر دیا۔ٹورنامنٹ میں سکولوں کی 8 ٹاپ ٹیمیں شرکت کریں گی۔
غنی انسٹیٹیوٹ آف کرکٹ ڈیفنس آمد پر محسن نقوی کا ٹورنامنٹ میں شریک ٹیموں کے کھلاڑیوں سے تعارف کرایا گیا۔ محسن نقوی نے کھلاڑیوں کی حوصلہ افزائی کی اور بہترین کھیل کھیلنے کی تلقین کی۔ انہوں نے پی سی بی کے تعاون سے لاہور سکول کرکٹ کپ کے انعقاد پر غنی انسٹیٹیوٹ آف کرکٹ اور ان کی پوری ٹیم کو مبارکباد دی اور ٹورنامنٹ میں حصہ لینے والی ٹیموں کیلئے نیک خواہشات کا اظہار کیا۔
چئیرمین پی سی بی نے ینگ سٹارز کی تلاش کے لیے ٹورنامنٹ کے انعقاد کو سراہا۔چئیرمین نے سکول کپ کے بہترین بیٹر۔ باولر۔ آل رانڈر۔ وکٹ کیپر اور دیگر کیٹیگریز کے لئے نقد انعامات کا اعلان کرتے ہوئے کہا کہ پی سی بی ہر کیٹیگری کے بہترین کھلاڑی کی بھرپور حوصلہ افزائی کرے گا۔
انہوں نے کہا کہ غنی انسٹیٹیوٹ آف کرکٹ کی جانب سے سکول کپ کی فاتح ٹیم کو 10 لاکھ اور رنر اپ ٹیم کو 5 لاکھ روپے کا انعام دیا جائے گا۔سکول کپ کے سیمی فائنل اور فائنل قذافی سٹیڈیم میں کرائے جائیں گے۔
ینگ سٹارز کو آگاہ کرنا ہے کہ کس طرح انہوں نے اپنی خوراک اور فٹنس کا خیال رکھنا ہے۔انوار غنی نے اسلام آباد میں بھی کرکٹ کلب بنانے سے اتفاق کیا ہے۔ امید ہے کہ جلد اس کرکٹ کلب کا افتتاح ہو گا۔ اس موقع پر غنی انسٹیٹیوٹ آف کرکٹ کے اعلی حکام پی سی بی کے ڈائریکٹر ڈومیسٹک عبداللہ خرم نیازی اور وہاب ریاض بھی موجود تھے۔
