پاکستانی ٹیم کا اسلام آباد پہنچنے پر شاندار استقبال، پھولوں کی پتیاں نچھاور

پاکستان انڈر 19 ٹیم ایشیا کپ جیت کر وطن واپس پہنچ گئی۔

اسلام آباد انٹرنیشنل ایئرپورٹ پر شاندار استقبال کیا گیا، پھولوں کی پتیاں نچھاور کی گئیں اور کھلاڑیوں کا ڈھول کی تھاپ پر بھنگڑے ڈال کر استقبال کیا گیا۔

بھارت کو بڑے مارجن سے فائنل میں شکست دینے والی انڈر 19 ٹیم پی آئی اے کی پرواز سے اسلام آباد پہنچی، چیف آپریٹنگ افسر سمیر احمد سید اور ڈائریکٹر ہائی پرفارمنس عاقب جاوید نے استقبال کیا۔

قومی انڈر 19ٹیم کی آمد پرآتش بازی کا شاندار مظاہرہ بھی کیا گیا، کھلاڑیوں کو گلدستے پیش کیے گئے، اس موقع پر ائیرپورٹ پر سکیورٹی کے سخت انتظامات کئے گئے تھے۔

پاکستان کرکٹ بورڈ کے چیئرمین محسن نقوی نے ٹیم کے ہر کھلاڑی کے لئے پچاس پچاس لاکھ روپے انعام کا اعلان کیا ہے، محسن نقوی نے بھارت سے فائنل جیتنے پر کھلاڑیوں سے ملاقات کی اور ان کے کھیل کی تعریف کی۔

بھارت کیخلاف چوکوں چھکوں کی برسات، پاکستان کی جانب سے سمیر منہاس نے ریکارڈ بنا ڈالا

فاتح ٹیم کے مینٹور سرفراز احمد نے اپنے بیان میں کہا کہ پاکستان زندہ باد، اللہ کا شکر ہے، الحمدللہ، مجھے اپنے لڑکوں اورکوچنگ اسٹاف پر فخر ہے۔

سرفراز احمد نے شاہد انور، راؤ افتخار، انجم منصور، امجد، ابرار احمد، علی حمزہ، ڈاکٹر عبید، اظہر علی، زوہیب خان اور محتشم علی کو خراج تحسین پیش کیا۔

===============================

بھارت کیخلاف چوکوں چھکوں کی برسات، پاکستان کی جانب سے سمیر منہاس نے ریکارڈ بنا ڈالا

ایشیا کپ انڈر 19 کے فائنل میں بھارت کے خلاف سمیر منہاس نے پاکستان کی جانب سے ریکارڈ قائم کر دیا۔

سمیر منہاس بطور اوپنر بیٹنگ کے لئے آئے اور کسی بھی بھارتی باؤلر کو خاطر میں نہ لائے، انہوں نے چھکوں اور چوکوں کے ساتھ شاندار بیٹنگ کی۔

انہوں نے 172 رنز بنائے، اس اننگز میں انہوں نے نو چھکے اور 17 چوکے لگائے، انہوں نے یہ مجموعہ 113 گیندوں پر اکٹھا کیا۔

انہوں نے 26 باؤنڈریاں لگائیں اور اس سے 122 رنز حاصل کئے، اس طرح باؤنڈریز کے ذریعے سمیر منہاس سب سے زیادہ رنز بنانے والے انڈر 19 پاکستانی کھلاڑی بن گئے ہیں۔

انڈر 19 ایشیا کپ فائنل، بھارت کے خلاف سمیر منہاس کے شاندار 172 رنز، پاکستان نے بڑا ہدف دے دیا

سمیر منہاس قبل یہ ریکارڈ شمائل حسن کے پاس تھا، انہوں نے 2023 میں سری لنکا کے خلاف 150 رنز بنائے تھے ان میں 94 رنز باؤنڈریز کے ذریعے حاصل کئے گئے تھے۔

انہوں نے سری لنکا انڈر 19 کے خلاف اس اننگ میں سات چھکے اور تیرہ چوکے لگانے کا اعزاز حاصل کیا تھا۔