قومی کرکٹ ٹیم کے تجربہ کار لیفٹ آرم اسپنر نعمان علی نے اپنے ہم وطن سابق ٹیسٹ کرکٹر فضل محمود کا 77 سال پرانا ریکارڈ توڑ دیا ہے۔
39 سالہ نعمان علی نے لاہور میں جنوبی افریقہ کے خلاف ٹیسٹ میچ میں میچ کے مجموعی طور پر 10 وکٹیں حاصل کیں، جو ان کے کیریئر میں تیسرا موقع تھا جب انہوں نے کسی میچ میں 10 یا زیادہ وکٹیں حاصل کیں۔
نعمان علی اب تک اپنے ٹیسٹ کیریئر میں 20 میچز میں 24.15 کی اوسط سے 93 وکٹیں حاصل کر چکے ہیں۔ فضل محمود کے بعد وہ صرف دوسرے پاکستانی بولر ہیں جنہوں نے اپنے پہلے 20 ٹیسٹ میچز میں تین مرتبہ میچ میں 10 یا زیادہ وکٹیں حاصل کی ہیں۔ فضل محمود نے یہ ریکارڈ 1952 سے 1958 کے درمیان قائم کیا تھا۔
اس سے قبل نعمان علی نے جنوبی افریقہ کے خلاف قذافی اسٹیڈیم میں پہلے ٹیسٹ میں سابق لیجنڈ اسپنر عبدالقادر کا 37 سال پرانا ریکارڈ بھی توڑ دیا تھا۔
نعمان علی پانچ مسلسل ٹیسٹ میچز میں سب سے زیادہ وکٹیں لینے والے پاکستانی بولر بھی بن گئے، انہوں نے اپنے 16ویں سے 20ویں ٹیسٹ کے دوران 46 وکٹیں حاصل کیں، جبکہ عبدالقادر نے 1987 اور 1988 میں 48ویں سے 52ویں ٹیسٹ میں 44 وکٹیں حاصل کی تھیں۔
پاکستانی اسپنر نعمان علی پچھلے 12 ماہ کے دوران دنیا کے سب سے کامیاب اسپنر بھی رہے ہیں۔ لاہور ٹیسٹ میں انہوں نے پہلی اننگز میں 6 اور دوسری اننگز میں 4 وکٹیں حاصل کیں۔
اس سال کے آغاز میں ویسٹ انڈیز کے خلاف پہلے ٹیسٹ میں 6 اور دوسرے ٹیسٹ میں 10 وکٹیں لینے کے بعد، انگلینڈ کے خلاف سیریز میں انہوں نے ملتان میں 11 اور راولپنڈی میں 9 کھلاڑیوں کو آؤٹ کیا تھا۔
نعمان علی نے ٹیسٹ میچ کے تیسرے روز بھی اپنا نام ریکارڈ بک میں درج کروایا، قذافی اسٹیڈیم میں جنوبی افریقہ کے خلاف سابق پاکستانی اسپنر اقبال قاسم کا 37 سالہ ریکارڈ توڑ دیا۔
39 سالہ نعمان علی نے جنوبی افریقہ کی پہلی اننگز میں 6 وکٹیں حاصل کیں، اور اپنے ٹیسٹ کیریئر میں نویں بار ایک اننگز میں 5 یا اس سے زیادہ وکٹیں لینے کا اعزاز حاصل کیا، جس کے ساتھ وہ ٹیسٹ کرکٹ میں سب سے زیادہ بار پانچ وکٹیں لینے والے پاکستانی لیفٹ آرم اسپنر بن گئے۔
