آسٹریلوی بگ بیش لیگ (BBL) کی معروف فرنچائز سڈنی سکسرز نے پاکستانی کرکٹ اسٹار بابر اعظم کے شائقین کے لیے ایک خصوصی فین زون ’’بابرستان‘‘ قائم کرنے کا اعلان کیا ہے۔

فرنچائز کے مطابق ’’بابرستان‘‘ کا افتتاح 17 دسمبر کو ایڈیلیڈ اسٹرائیکرز کے خلاف میچ کے دوران کیا جائے گا۔ کلب نے مداحوں کو خبردار کیا ہے کہ چونکہ نشستیں محدود ہیں، اس لیے وہ جلد از جلد اپنی ٹکٹیں بک کروائیں تاکہ اس تاریخی لمحے کا حصہ بن سکیں۔

یہ خصوصی فین زون بابر اعظم کے مداحوں کے لیے ایک منفرد تجربہ ثابت ہوگا، جہاں وہ اپنے پسندیدہ بلے باز کو قریب سے ایکشن میں دیکھ سکیں گے۔ ’’بابرستان‘‘ میں تھیمڈ سجاوٹ، خصوصی نشستیں اور جوش و خروش سے بھرپور ماحول فراہم کیا جائے گا تاکہ فینز اپنے کرکٹ ہیرو کی موجودگی کا بھرپور لطف اٹھا سکیں۔

اس موقع پر بابر اعظم نے اپنے ویڈیو پیغام میں مداحوں سے کہا:

“میں تمام فینز کو دعوت دیتا ہوں کہ ’بابرستان‘ آئیں اور سڈنی سکسرز کے ہوم میچز میں ہمیں سپورٹ کریں۔”