کیپیٹل ڈیولپمنٹ اتھارٹی (سی ڈی اے) نے اسلام آباد میں نئے بین الاقوامی کرکٹ سٹیڈیم کی تفصیلی منصوبہ بندی کو حتمی شکل دے دی ہے۔ دستاویزات کے مطابق اس میگا پروجیکٹ پر تقریباً 12 ارب روپے لاگت آئے گی، جو وفاقی دارالحکومت کے اسپورٹس ڈھانچے میں ایک انقلابی اضافہ ثابت ہوگا۔
نیا سٹیڈیم اسلام آباد کے سیکٹر ڈی-12 کے قریب، مارگلہ ہلز کے دامن میں تعمیر کیا جائے گا، جس کی وجہ سے اسے نہ صرف قدرتی خوبصورتی بلکہ ایک مرکزی اور نمایاں لوکیشن بھی حاصل ہوگی۔
حکام کے مطابق، تجویز کردہ اسٹیڈیم میں 25 ہزار شائقین کی بیٹھنے کی گنجائش ہوگی جبکہ گراؤنڈ کا پچ ڈائیامیٹر 148 میٹر رکھا گیا ہے۔ سٹیڈیم کا ڈیزائن دنیا کے جدید ترین کرکٹ وینیوز، خصوصاً دبئی انٹرنیشنل اسٹیڈیم سے متاثر ہے۔
تین منزلوں پر مشتمل اسٹیڈیم میں نچلا حصہ عام شائقین کے لیے، درمیانی حصہ وی آئی پی اور پریمیئم نشستوں کے لیے جبکہ اوپری حصہ سایہ دار نشستوں کے لیے مخصوص ہوگا۔ سی ڈی اے حکام کا کہنا ہے کہ ڈیزائن میں شائقین کی آمد و رفت کو آسان بنانے، میدان کا واضح نظارہ یقینی بنانے اور میچ ڈے کے تجربے کو عالمی معیار کا بنانے پر خصوصی توجہ دی جا رہی ہے۔
اسٹیڈیم کی جدید سہولیات میں سب سے نمایاں ’’رِنگ آف فائر‘‘ ایل ای ڈی لائٹنگ سسٹم ہے، جو دبئی اسٹیڈیم کی طرز پر چھت کے گرد نصب کیا جائے گا۔ یہ نظام روایتی بلند فلڈ لائٹ ٹاورز کی جگہ لے گا اور یکساں روشنی فراہم کرتے ہوئے میدان میں سائے کم کرے گا۔ MUSCO سپورٹس لائٹنگ کو معیار کے طور پر استعمال کیا جا رہا ہے، اور چھت کے لیے مختلف عالمی معیار کے ڈیزائن زیرِ غور ہیں۔
سی ڈی اے کے حکام کا کہنا ہے کہ یہ سٹیڈیم اسلام آباد کی ایک نئی شناخت بنے گا اور پاکستان کی صلاحیت کو مزید مضبوط کرے گا تاکہ مستقبل میں بڑے بین الاقوامی کرکٹ ایونٹس کی میزبانی کی جا سکے۔ اس کے علاوہ، اپنی لوکیشن اور جدید تعمیراتی معیار کے باعث یہ سٹیڈیم جلد ہی وفاقی دارالحکومت کا نمایاں ترین اسپورٹس اور آرکیٹیکچرل لینڈ مارک بن جائے گا۔
